كل سنه وانت طيبين

لأمي واختى وجدتي ولحبيبي اللى هيبقى جوزي - وان كنت لسه معرفوش - ولراجلي وسندي وعزوتي باسم جمال ولاخويا اسلام وبابا ولاحمد عبد الله ولجيجي ومحمد اخواته ومامته و لمنى امين وجمانا وهبة ويارا ونرمين وسالى وامل ونهى ودينا ودعاء سمير ولهدى ومنى بنات خالتى وايمان بنت عمو عزت وجنى وجمانا بناتها ولانجي سمراء النيل ولعماد سعيد ودكتور احمد الضرغامي وعمرو اسكندرية واسلام الدرولي ودكتور هاني عبد الوهاب و محمد ابو شنب وهشام اللى دايما فاكرنى واحمد خيرالله و احمد شوقي و احمد طلعت ولخليل العابد وماهر جنيدي ووائل الكميلي ومحمد هشام عبيه و عمر مصطفى وأيمن عبد الله و احمد شلبي البورسعيدي وماريو البورسعيدي ومحمد عوض وسامية جاهين وعمرو ورحاب بسام و لاحمد شقير ومكسوفة وهانى محمود ومحمد سالم سكرتير تحرير الجمهورية وللمترو وعربية السيدات وللبايعيين السريحة ولأطفال الشوارع وللرجالة المحترمة ولعلاء الاسواني و لوسط البلد ولناصية كنتاكي وكوبري قصر النيل والكورنيش والولد والبنت اللى ماشيين ايدهم في ايد بعض وباين عليهم انهم بيحبوا بعض
ولقهوة الندوة الثقافية وزهرة البستان ولقناة او تي في ولعمر طاهر
و قناة صانعوا القرار ولدريم ولمنى الشاذلى والعاشرة مساءا و لوشوش الناس العواجيز وهى بتضحك او سرحانة وشكل العيال الصغيرة وهي بتاكل ومكسوفين و لسينما اديون
ولأي مسرح على وجه البسيطة لكل فنان بجد ولكل مصري حتى النخاع ولكل حد لسه بيشمئز م الظلم وبيضايق م الفوضى وللشيكولاتة وكل الرجال المسنين اللي بيقعدوا ف المواصلات ويناموا وكل البنات اللى بيخرجوا الصبح بدري ف البرد يروحوا الشغل لكل ست بتسهر تهدهد ابنها اللى بيعيط ولكل زوج مبينساش يبوس مراته قبل ماينزل يروح الشغل ويقولها لا اله الا الله لطوابير العيش وبايعين المناديل الورق للبلوجات والمدونين ولوجيه عزيز وفيروز والشيخ امام ونجم ولعدوية ولكل البنات اللى ما بيتعاكسوش وكل البنات اللى بيتعاكسوا لمكان شغلي ولأجهزة الكمبيوتر وللازهر بارك وكل اللى حبيتهم ومحبونيش وكل اللى حبونى ومعرفتش احبهم صح وكل اللى قابلتهم في طريق وافترقنا فى نهايته ولكل محلات الكشري اللي بتكتب بخط واضح الشطة نار بجد مش هزار وكل عربيات الفول ساعة الصبحية والموظفين اللى واقفين ياكلوا عليها ولأرغفة الحواوشي وسلينترو وبابا عبده وكنتاكي احيانا وللكتب في كل مكان وللفيس بوك والناس اللى بنلاقيهم عليه وللسيدة نفيسة ولملاجئ الايتام ولبيوت العجزة لحواري القاهرة والستات والرجالة قاعدين قصاد البيوت ولكوم غراب ومنشية ناصر ولسواقين الميكروباصات اللي بيكتبوا من ورا : لو الرزق كان بالجري ماكانش حد حصلني وكل الموظفين والعمال اللى اعتصموا او اضربوا عن الطعام وكل الشباب اللى غرقوا ولسه غرقانين لورق الدشت والايميل والرسائل القصير وو العراق وسيدنا الحسين والمطار والمدارس الابتدائية المشتركة والمدارس الثانوية بنات ولحزب الله و كل الناس المتغربة بتجري ورا الاحلام وكل الناس اللى عايشة بالامل رغم ان حياتهم غامقة ولكل ام بتشيل اللقمة من بوقها وتأكلها لولادها ولكل راجل مشتراش لبس بقالوا عشر سنين ونازل يشتري لولاده لبس العيد ولكل الناس اللى لسه بتحس ببعضها وبيقفوا جنب بعض ف الازمات وللناس اللي بتتبرع بدمها والشباب اللى بيقوموا للكبار ف المواصلات والناس اللي مبترميش زبالة ف الارض والشباب اللى لسه رافضين يحبوا الا لما يبقوا قادرين يتجوزوا ولكل اللي هيبكوا النهاردة وهما بيتفرجوا على التليفزيون عشان كان نفسهم يبقوا على عرفات مع الحجاج و لكل الى ما قدروش يجيبوا لحمة العيد ولا هدوم العيد ولكل اللي جابوا هدوم العيد لان الناس هتشوفها وماجابوش لحمة العيد لان الباب المقفول بيستر ، كل اللى مش هيزوروا قرايبهم لانهم مش هيقدروا يدوا عيدية للعيال ، وكل اللي بقوا بيزعلوا من العيد ونفسهم ما يجيش عشان المصاريف
مصر


mn blog : http://smsmamosaic.blogspot.com/